Саюз сапраўдных сябровак

У сераду, 14 снежня, сваё 25-годдзе адзначыла самая шматлікая жаночая грамадская арганізацыя нашай краіны – “Беларускі саюз жанчын”. У паўсядзённых зносінах – а сустракацца выпадае часта – яго прадстаўніцы звяртаюцца адна да адной цёплым словам “сяброўка”. І сябраваць (чытайце – падтрымліваць, дапамагаць) яны ўмеюць як паміж сабой, так і з іншымі людзьмі. Аб гэтым – інтэрв’ю-справаздача са старшынёй Камянецкай раённай арганізацыі ГА “Беларускі саюз жанчын” Аленай Шаблінскай.

– Алена Іванаўна, прапаную перш-наперш звярнуцца да гісторыі раённай арганізацыі, якой кіруеце з 2013 года.
– Пачынальнікамі ў гэтай важнай справе былі ў свой час Марыя Іванаўна Пяркоўская, Ніна Астапаўна Нікіцюк, Надзея Паў­лаўна Нікіціна, а потым – я.

– Колькі членаў налічвае арганізацыя сёння?
– Больш за паўтары тысячы. Увогуле ж на Камянеччыне, па даных на пачатак бягучага года, – 35 666 жыхароў. 18 699 з іх – жанчыны.

– А пярвічак…
– Трыццаць чатыры. Самыя шматлікія працуюць у ААТ “Агра-Зарэчча” – 118 членаў, рэспубліканскім санаторыі “Белая вежа” – 70, тэрытарыяльным цэнтры сацабслугоўвання, які ўзначальваю, – 84, ААТ “ААБ Беларусбанк” – 47…

– Вы, безумоўна, цесна супрацоўнічаеце з прадстаўнікамі мясцовай улады.
– Павінна адзначыць, што падтрымка з гэтага боку даўно стала традыцыяй. У свой час маім папярэдніцам заўсёды дапамагала ва ўсіх пачынаннях колішні старшыня раённага Савета дэпутатаў Ніна Данілаўна Стасюк, а мяне сёння падтрымлівае Ірына Іванаўна Нігерыш. Прыемна ўжо тое, што старшы­нёй райсавета з’яўляецца жанчына. Акрамя таго, прадстаўніцы прыгожай паловы чалавецтва складаюць 41 працэнт ад усіх дэпутатаў мясцовых Саветаў дэпутатаў нашага раёна. Без сумненняў, гэта – на карысць.

– Ёсць у вас таксама іншыя сябры?
– І нямала, на шчасце. Гэта прадстаўнікі выканаўчай і распарадчай улады, як я ўжо сказала, грамадскіх арганізацый (“Белая Русь”, “БРСМ”, савет ветэранаў), прадпрыемстваў і арга­нізацый розных форм уласнасці (ТЦСАН, упраўленне па працы, занятасці і сацыяльнай абароне насельніцтва, аддзел ЗАГС, “Камянецкая ЦРБ”, ААТ “Белавежскі”)… Усіх і не пералічыш!

– Завяршаецца чацвёрты год вашага кіравання раённай арганізацыяй “БСЖ”. Якім быў гэты перыяд?
– На яго прыпала шмат палітычных, гістарычных і культурных падзей у Рэспубліцы Беларусь, у баку ад якіх мы, жанчыны, застацца не маглі ніяк. Гэта выбары Прэзідэнта нашай краіны, дэпутата Палаты прадстаўнікоў Нацыянальнага сходу РБ і ў мясцовыя Саветы дэпутатаў, 70-годдзе вызвалення Рэспублікі Беларусь ад нямецка-фашысцкіх захопнікаў і Перамогі ў Вялікай Айчыннай вайне… Ва ўсіх мерапрыемствах нашы прадстаўніцы паказалі свае дзелавыя якасці, актыўнасць і неабыякавасць.

– Якім катэгорыям насельніцтва ваша арганізацыя ўдзяляе асаблівую ўвагу?
– Сем’ям. Да пачатку навучальнага года, напрыклад, рассылаем на прадпрыемствы і ў гаспадаркі раёна лісты з просьбай дапамагчы матэрыяльна шматдзетным бацькам, якія выхоўваюць дзяцей-школьнікаў. Грошы да новага 2015/2016 навучальнага года атрымалі 183 сям’і, сума – 197384 мільёны недэнамінаваных рублёў. Штогод праводзім акцыю “Першы раз у першы клас”, перадаём канцылярскія тавары дзецям з мнагадзетных, няпоўных і нядобранадзейных сем’яў. У 2014-м з нашай дапамогай былі набыты падарункі для ўдзельнікаў агляду-конкурсу «Лепшая мнагадзетная сям’я года».

Не абыходзім увагай і праблему насілля ў сям’і, пра якую, на жаль, жыхаркі нашага раёна даволі добра ведаюць. Удзельнічаем у акцыі “Сям’я без насілля”.

– Працуеце таксама з ветэранамі і пажылымі людзьмі?
– Безумоўна, бо ведаем, што для іх клопат асабліва каштоўны. Напрыклад, сумесна з раённымі ваенкаматам і саветам ветэранаў мы перадалі юбілейныя медалі “70 гадоў Перамогі” шаноўным ветэранам, а дзякуючы спонсарскай дапамозе ТАА «Еўрагандаль» парадавалі іх яшчэ і прадуктовымі наборамі. Не абышлося без нас і ў акцыі “Лісты Вялікай Перамогі”. Акрамя таго, да 8 Сакавіка сёлета ў межах акцыі “Даніна павагі” наша арганізацыя ўручыла сувеніры і віншавальныя паштоўкі жанчынам – ветэранам Вялікай Айчыннай.

– А яшчэ?
– Нашы сяброўкі праводзяць ва ўсіх установах культуры, адукацыі, сацыяльнай абароны, гарсельвыканкамах сустрэчы, тэматычныя вечарыны, сходы, прымеркаваныя да Дня сям’і, Дня маці, Дня інвалідаў і Дня абароны дзяцей. Сама неаднаразова ўдзельнічала ва ўручэнні Ордэна маці, што было вельмі пачэсна.

Да таго ж, прадстаўнікі нашай арганізацыі ў 2015 годзе далучыліся да правядзення ў раёне конкурсу сачыненняў сярод вучняў 8-11 класаў на тэму “За што я люблю сваю вёску”.

– Ведаю, што сёлета адна з сябровак “БСЖ” стала “Жанчынай года”…
– Так. Гэта Наталля Раманюк, гаспадыня аграэкатурыстычнай сядзібы “Тры калодзежы”. І, да­рэчы, яна не першая з жыхарак раёна, якая ўдастоілася гэтага ганаровага звання. Па ініцыятыве нашай арганізацыі такі ж гонар выпаў раней Ганне Грушэўскай, Валянціне Крывец і іншым.

Акрамя таго, у 2015 годзе па прапанове прэзідыума раённай арганізацыі 5 цудоўных жанчын Камянеччыны ўнесены ў міжнародную энцыклапедыю “Хто ёсць хто ў Рэспубліцы Беларусь”. Сёння на яе старонках стала замацаваліся нашы сяброўкі Людміла Жалязка (сацыяльны работнік аддзялення сацыяльнай дапамогі дома “Камянецкага ТЦСАН”, уладальніца Падзякі Камітэта па працы, занятасцi i сацабароне аблвыканкама і Ганаровай граматы Міністэрства працы і сацыяльнай абароны Рэспублікі Беларусь…); Валянціна Крывец (кіраўнік узорнага ансамбля эстраднага танца “Капрыз”, уладальніца Ганаровай граматы ўпраўлення культуры аблвыканкама, персанальнай надбаўкі Міністэрства культуры РБ за высокія дасягненні ў сферы культуры і інш.); Ала Агаркава (былы настаўнік англійскай і нямецкай моў Высокаўскай СШ, Заслужаны настаўнік БССР); Ганна Сірацюк (спартсмен-інструктар, чэмпіёнка шматлікіх спаборніцтваў па спартыўных танцах на калясках); Лізавета Фралянкова (былы настаўнік рускай мовы і літаратуры СШ №1 г.Каменец, Заслужаны настаўнік БССР, узнагароджана ордэнамі “За доблесную працу”, “Ветэран працы”, «60 гадоў Перамогі ў Вялікай Айчыннай вайне 1941-1945 гг.»).

– Набліжаюцца доўгачаканыя зімовыя святы. Што рыхтуеце да іх?
– Мы штогод спрабуем сябе ў ролі чараўніц і ўжо далучыліся да рэспубліканскай акцыі “Нашы дзеці”. Напэўна, многія бачылі ў асобных магазінах райцэнтра скарбонкі для збору пачастункаў для дзяцей-інвалідаў. Усё, што пакладуць у іх неабыя­кавыя людзі, пераўтворыцца ў падарункі, якія мы перададзім дзяўчынкам і хлопчыкам падчас навагодніх ранішнікаў у Каменцы і Высокім, арганізаваных аддзеламі ідэалагічнай работы, культуры і па справах моладзі і адукацыі, спорту і турызму райвыканкама. Далучыцца можа кожны грамадзянін, любая арганізацыя і прадпрыемства.

– І на заканчэнне… У чым, на вашу думку, сіла жанчыны?
– У цярпенні, пазітыўным настроі, веры, міласэрнасці і суперажыванні.

І любові – дадам ад сябе. Гэта сцвярджае таксама і гімн “БСЖ”: “Мы – Союз белорусских женщин и любовью своей сильны”.

Гутарыла Настасся НАРЭЙКА. Фота аўтара і з архіва раённай арганізацыі.

P. S. Сёлета ў лістападзе Алена Шаблінская была ўзнагароджана Граматай абласной арганізацыі ГА “Беларускі саюз жанчын” за развіццё жаночага руху ў раёне, накіраванага на абарону інтарэсаў сям’і, мацярынства і дзяцінства і ў сувязі з 25-годдзем арганізацыі. Віншуем!