Дэлегат Усебеларускага народнага сходу: «Мы ўсе павінны ўзяць адказнасць за будучыню краіны»

Упершыню дэлегатам Усебеларускага народнага сходу выбрана загадчыца амбулаторыі ўрача агульнай практыкі аграгарадка Відамля Алена Шурхай. Такі давер землякоў лічыць ганаровай і адказнай місіяй.

Крыху больш за два тыдні застаецца да ўсенароднага форуму (ён адбудзецца 11-12 лютага). І сёння знаёмім вас з яшчэ адной прадстаўніцай Камянеччыны, якая возьме ўдзел ва ўсе­народным сходзе.
Амаль тры тысячы прадстаўнікоў народа будуць гаварыць і вырашаць ад яго імя. А сёння ўсе яны на сваіх працоўных месцах, у сваіх калектывах, сярод зем­лякоў. І добра ведаюць усе іх патрэбы і спадзяванні.

– Алена Пятроўна, колькі вёсак і іх жыхароў пад апекай Відамлянскай амбулаторыі ўрача агульнай прак­тыкі?
– Наша амбулаторыя абслугоўвае 1900 чалавек – дарослых і дзяцей; гэта 15 малых населеных пунктаў. Аўтатран­спар­там мы забяспечаны.
– Як эпідсітуацыя паўплывала на прыярытэты ў свядомасці пацыентаў?
– Заўважаем, што людзі пачалі больш адказна ставіцца да стану свайго зда­роўя, павялічылася колькасць зваротаў па медыцынскую дапамогу ў амбулаторыю і дома. Калі раней на той ці іншы сімптом не надта звярталі ўвагу, дык цяпер многія лічаць за лепшае параіцца з ме­дыкамі.
– Як працавалася ў рэжыме ка­ран­ціну?
– Падчас каранціну з прычыны каро­навіруснай інфекцыі работа была значна больш напружанай, павялічылася коль­касць гадзін працы амбулаторыі, як і час абслугоўвання насельніцтва дома, – нават пасля завяршэння працоўнага дня, бо многім пацыентам па стану здароўя патрабавалася больш увагі і большая працягласць назірання.
– Колькі выпадкаў захворванняў на кавід-19 было ў вашай зоне ад­казнасці?
– За перыяд першай і другой хвалі каронавіруснай інфекцыі такіх выпад­каў было многа; напрыклад, толькі за снежань мінулага года – каля 70-і.
– Як падтрымліваеце сувязь з кан­тактамі розных узроўняў і самаіза­ляванымі?
– З хворымі на каронавірусную ін­фекцыю і так званымі кантактамі рознага ўзроўню штодня маем сувязь шляхам асабістага наведвання іх медработ­нікам або па тэлефоне – з далейшай адз­накай аб стане здароўя ў амбулаторных картах пацыентаў.
– Ці шмат было жадаючых зрабіць прышчэпку ад грыпу ўвосень?
– Штогод праводзім з насельніцтвам прафілактычныя гутаркі – у аргані­за­цы­ях, школах, дзіцячых садах, нагадваем пацыентам амбулаторыі пра вакцынацыю супраць грыпу, тлумачым, чаму яна неабходная. У выніку колькасць жадаючых зрабіць прышчэпку павялічваецца. Упэўнена, што людзі з разуменнем паста­вяцца і да вакцынацыі ад каронавірусу, якая пачалася ўжо ў Беларусі.
– Якія парады цяпер найчасцей ат­рымліваюць ад вас сяльчане?
– Рэкамендуем насельніцтву захоў­ван­не масачнага рэжыму, абмежаванні ў наведванні масавых мерапрыемстваў, захоўванне дыстанцыі і санітарных нор­маў дзеля прафілактыкі, а таксама – вак­цынацыю, час якой усё бліжэй да нас.
– Дзяржава робіць многае для забеспячэння дэмаграфічнай бяспекі. Але вёскі па-ранейшаму пусцеюць. А як на тэрыторыі, што пад апекай Відамлянскай амбулаторыі?
– Нараджальнасць у нас павяліч­ва­ец­ца. Будуецца жыллё як за кошт уласных грашовых сродкаў грамадзян, так і прадпрыемстваў. Маладыя спецыяліс­ты застаюцца тут працаваць, бо створаны ўсе ўмовы і для камфортнага пражывання сем’яў. Летась у нас нарадзілася 18 дзяцей.
– Вашы чаканні ад усенароднага форуму?
– Цяпер будучыня Беларусі сапраўды залежыць ад кожнага з нас, бо расце і палітызацыя грамадства. Мяркую, Усе­беларускі народны сход – тая трыбуна, дзе і павінны вызначацца накірункі далейшага развіцця нашай дзяржавы.
– З якімі асабістымі ініцыятывамі накіруецеся ў Мінск?
– Хацела б, каб у нашай краіне за­ха­валіся ўсе тыя стымулюючыя мерапрыемствы, што накіраваны на павелічэнне нараджальнасці, а таксама – былі прыняты новыя законапраекты, што будуць садзейнічаць значнаму паляпшэнню дэ­маграфічнай сітуацыі ў дзяржаве.

Распытвала Галіна НОВІК.