Камянчанка Людміла Алексяюк перамагла ў фотаконкурсе АНТ

Магчыма, нехта з камянчан, гуляючы па вуліцах райцэнтра ў дажджлівы дзень, заўважаў дзяўчыну, якая хаваецца ад халодных кропель пад яркім жоўтым парасонам, што прываблівае позіркі лагатыпам АНТ? Калі так, то ведайце: вы сустрэліся з Людмілай Алексяюк, якая летам 2020-га перамагла ў фотаконкурсе гэтага тэлеканала.

Як гэта было? Люда часта глядзела па АНТ перадачу “Ме­тэа­гід”, захаплялася здым­ка­мі тых, хто ўдзельнічаў у конкурсе “Стоп-кадр”, і аднойчы вырашыла далучыцца да іх ліку. Дзяўчына сабрала лепшыя свае фатаграфіі (іх атрымалася каля 100 з нечым) і адправіла на названы па тэ­ле­візары адрас. А падчас наступнай перадачы пачула з вуснаў вядучай Ірыны Рамбальскай імя чарговага пераможцы і не паверыла вушам: “Людміла Алексяюк з Каменца!” Фатаграфія, адз­начаная падарункам, з’я­ві­ла­ся на экране тэлевізара, а сён­ня на гэтай старонцы “НК” яна займае галоўнае месца. Прыгожа, ці не так? Вельмі!

Праз некаторы час у паштовай скрынцы Люды з’яві­ла­ся паведамленне аб пасылцы, а ў ёй аказаўся (як вы, напэў­на, ужо здагалаліся) “сонечны” парасон.
Увогуле, з Людмілай Алексяюк даўно і добра знаёмыя завочна ўсе падпісчыкі групы “НК” ВКонтакте, на сцяне якой перыядычна з’яўля­юц­ца яе ціка­выя кадры, зробленыя на камеру тэлефона. Самы яс­кравы з іх мы прапаноўваем вашай увазе…

* * *
– Якая сіла цягне цябе выпраўляцца на “фотапаляванне”? – цікаўлюся ў Люды.
– Не магу проста сядзець дома. Хочацца прагуляцца, тым больш, што Каменец – вельмі прыгожы горад. Варта толькі зірнуць уважлівей.
Напрыклад, аднойчы зра­біла цікавы кадр у двары свай­го ж дома, паказала яго маме, а яна: “Ты дзе гэта сфатаграфавала?” Я растлумачыла. І ведаеце, што мама сказала? “Не веру!”

Лічу, што ў любым, самым звычайным, звыклым месцы можна знайсці нешта прыгожае.
Фатаграфую я паўсюдна, дзе бываю: у лесе (у перапынках падчас збору грыбоў), у манастыры, куды аднойчы ез­дзіла… Часта ў мой аб’ектыў трапляюць прыгожыя рас­лі­ны, жывыя істоты (вавёркі, ма­тылькі, птушачкі…)
Прыгажосць – побач з намі!
Настасся НАРЭЙКА.
Фота Людмілы АЛЕКСЯЮК.