21 лютага – Дзень работнікаў землеўпарадкавальнай і картографа-геадэзічнай службы

Збудаваў дом, пасадзіў сад, а ці не забыў узаконіць усё гэта? – тое пытанне землеўпарадкавальнікі амаль штодня задаюць не ад залішняй цікаўнасці.

Землеўпарадкавальная служба нашага раёна – сямёра спецыялістаў (трое з іх працуюць у Высокім) на чале з Мікалаем Юшкевічам, яго намеснік – Марыя Якімовіч.

Кожны з населеных пунктаў пад апекай канкрэтнага супрацоўніка. Больш за тое, кожную нядзелю, па пятніцах, у Дзмітровіцкім сельскім Савеце прымае грамадзян Валянціна Кавалёва з Высокага (Дзмітровічы з 2013 года ў высокаўскай зоне абслугоўвання).

– На працягу дня людзі прыходзяць, каб атрымаць кансультацыю, здаць пакет дакументаў, удакладніць дэталі задуманага…

Калі толькі пачалі практыкаваць штотыднёвы выезд у Дзмітровічы, прыходзіла многа вяскоўцаў. З часам чаргі ля дзвярэй не стала, – гаворыць Валянціна Уладзіміраўна, – але некалькі чалавек у вызначаны дзень абавязкова не прамінуць скарыстаць такую зручнасць, як выязны прыём. На тэрыторыі сельсавета ж амаль дзве тысячы жыхароў.

Зямельны Кодэкс са змяненнямі і дапаўненнямі 2008 года ўвабраў у сябе нямала пытанняў, якія часам мелі двайны сэнс – цяпер стала больш проста кіравацца імі, тлумачыць іх грамадзянам.

Галіна Беланогая працуе ў Высокім амаль 20 гадоў. Пад яе апекай Раснянскі, Белавежскі, Агародніцкі сельсаветы.

– Калі ў адносінах нерухомасці не ўзнікае пытанняў,калі яна зарэгістраваная, для ўзаконьвання зямельнага ўчастка часцей за ўсё дастаткова напісаць толькі заяву. Больш грамадзян да нас звяртаецца вясной і летам, у тым ліку і з мэтай афармлення ўчасткаў для вядзення ўласнай падсобнай гаспадаркі. Юрыдычныя асобы актыўна супрацоўнічаюць з намі і зімой, звычайна з нагоды ўнутрыгаспадарчага будаўніцтва, а таксама – новага, у населеных пунктах. Землеўпарадкавальная служба бярэ ўдзел у падборы месца размяшчэння будучай новабудоўлі, аналізуе “прывязку” яе да існуючай інфраструктуры. Цесна супрацоўнічаем з сельскімі Саветамі, у тым ліку пры перадачы земляў у севазварот. Пасля зносу старых хат у Чарнёве амаль паўтара гектара зямлі перададзена для “Белавежскага”. А вось у Чапялях больш ахвотна ўступаюць у спадчыну нашчадкі, купляюць хаты дачнікі, чаго не скажаш пра Бардзёўку, хоць і да Высокага адтуль блізка.

Пад увагай Сяргея Васілюка – Высокае і Ратайчыцкі сельсавет.

– Апошнім часам асноўны клопат – выраб дакументацыі на зямельныя ўчасткі для новай забудовы. У 2012 годзе быў вызначаны новы квартал для індывідуальнага будаўніцтва ў раёне Кавалікаў. Больш як 80 новых забудоўшчыкаў ужо аформілі тут свае ўчасткі, а шасцёра гаспадароў летась завяршылі будоўлю. У новым квартале “прабіта” яшчэ адна вуліца, і неўзабаве тут будуць прапанаваны каля 40 участкаў.

Тым часам рыхтуем дакументацыю для прадастаўлення зямельнага ўчастка пад будаўніцтва 99-кватэрнага жылога дома па вуліцы Сацыялістычнай; яго будзе будаваць у Высокім кобрынскае прыватнае ўнітарнае прадпрыемства “Рамсантэхбуд”.

Галіна НОВІК. Фота Міколы ШУМА.