2000? Лёгка!

Не паспелі адгучаць фанфары з нагоды першай тысячы тон зерня, намалочанай сямейным экіпажам Кухтаў з “Белавежскага”, як прадстаўнікі райкама прафсаюза работнікаў АПК і раёнкі, а таксама генеральны дырэктар гаспадаркі ўжо спяшаюцца да іх на поле зноў. З якой прычыны? Бо, па даных на 12 жніўня, Валерый Уладзіміравіч і Таццяна Сямёнаўна першымі ў вобласці (ацаніце гэты момант!) пераадолелі мяжу ў дзве тысячы!

Акрамя аўтара гэтых радкоў, былі ў полі і іншыя прадстаўнікі СМІ, калі дакладней – Брэсцкага тэлебачання. А пазней віншаваць двухтысячнікаў прыехаў сам старшыня абласнога выканаўчага камітэта Анатолій Ліс.

Падчас планавага прыпынку камбайна для падзапраўкі прадстаўнікі сямейнага экіпажа ў чарговы раз апынуліся перад аб’ектывам рэдакцыйнага фотаапарата. Мне ўдалося “захаваць” з яго дапамогай самыя прыемныя моманты: уручэнне грашовых прэмій генеральным дырэктарам ААТ “Белавежскі” Юрыем Марозам і каштоўных падарункаў ды стужак “Пераможца жніва” старшынёй райкама прафсаюза работнікаў аграпрамысловага комплексу Ірынай Дуднікавай. Цёплыя словы, безумоўна, надоўга застануцца ў сэрцах Валерыя і Таццяны Кухтаў.

– Што дапамагае вам вытрымліваць такі тэмп у рабоце? – цікаўлюся ў іх.
– Жаданне як мага хутчэй сабраць ураджай, – распавядае старшы камбайнер. – Шкада, калі ён загіне з-за капрызаў надвор’я.
– А яшчэ, безумоўна, дапамагае тое, што мы – сям’я, – дадае Таццяна Сямёнаўна. – З паўслова разумеем адно аднаго.

– Хто ж з вас галоўны? – задаю каверзнае пытанне.
– Дома жонка верхаводзіць, а на жніве я – гаспадар, – з усмешкай адзначае Валерый Уладзіміравіч.

– Якую параду далі б навічку, што выбірае: удзельнічаць у жніве ў якасці камбайнера ці не?
– Удзельнічаць! – без роздумаў адказваюць мае суразмоўцы. – Гэта цікава. Спярша будзе і страшна, і цяжка. І перажыванняў – мора. Але перамогі натхняюць!

Каму, як не сямейнаму экіпажу Кухтаў, дакладна ведаць гэта?..

Настасся НАРЭЙКА. Фота аўтара.