Чэмпіён прапіску не змяніў

18 студзеня ў камянецкім спарткомплексе ў межах першынства раёна адбыліся фінальныя гульні па валейболе сярод юнакоў, у якіх чацвёрку мацнейшых склалі вучні Белавежскай, Камянюцкай, Вайскоўскай школ і СШ №1 г.Каменец.

Удала выступіла камянецкая каманда ў складзе Мікіты Хвісюка, Дзяніса Грачаніка, Паўла Ярмаловіча, Валянціна Пашкевіча, Аляксандра Лысковіча, Вадзіма Грысевіча і Андрэя Шыдлоўскага (на здымку ўнізе). Тыдзень таму, на “Белай вежы – 2014”, яны не змаглі пераламаць ход паядынку з астрамечаўцамі і саступілі ў барацьбе за першае месца. Зараз жа камянчане свой шанц не ўпусцілі. І, як і год таму, даказалі, што ў раёне яны лепшыя. Тры гульні – тры перамогі. Маглі, праўда, і зноў праляцець міма першага месца. Але камянюцкіх валейбалістаў, якія змаглі навязаць апанентам упартую барацьбу, хапіла толькі на тое, каб выйграць адну партыю. Затое ў астатніх паядынках яны спуску сапернікам не давалі і заваявалі другое месца. Войскія ж вучні, добра распачаўшы турнір, не змаглі падтрымаць пачын і сталі трэцімі. Белавежцы, якія ў мінулым сезоне аступіліся толькі аднойчы (непераадольнай прыступкай тады стала каманда СШ №1), цяпер саступілі ва ўсіх паядынках і, як вынік, засталіся без прызавога месца.