Чэмпіянаты завярнулі на другі круг

Напрыканцы мінулага тыдня прайшлі матчы дзясятага тура чэмпіянату раёна па футболе.

У першай гульні, якая прайшла яшчэ ў пятніцу, 10 жніўня, сустрэліся ФК “Каменец” і “Каленкавічы”. Фактычна пераможца гульні стаў вядомы яшчэ да перапынку: камянчане больш кант­ралявалі мяч, што і вылілася ў забітыя мячы. Лік у матчы адкрыў Андрэй Шурко. Пачын таварыша падтрымалі Дзяніс Абрамчук (дубль) і Мікалай Брэсцкі. У другім тайме камянчане не спыніліся і змаглі яшчэ тройчы капітуляваць вароты сапер­нікаў. Галамі адзначыліся Міхаіл Шуруеў, Віталій Пашкевіч і Уладзімір Куляшоў.

Уражвае гульня “Агра-Зарэчча”. Каманда ўжо чацвёртую гульню запар не прапускае. Вось і ў гэтым туры ў сустрэчы са “Стаў­скім” войскія футбалісты захавалі вароты “сухімі”. Пры гэтым іх сапернікам давялося пяць разоў даставаць мяч з сеткі. Бамбардырскі рахунак папоўнілі Мак­сім Пушкарэвіч, Уладзіслаў Міх­нюк, Раман Іванюковіч, Павел Шосцік – у першым, і Сяргей Супрун – у другім таймах.

Не прайграе і “Ніва”, якая займае другое месца ў турнірнай табліцы. У чарговым туры на выездзе быў перайграны ФК “Высокае”. Як ужо не раз здаралася ў гэтым чэмпіянаце, каб зайграць па-сапраўднаму, ніваўцам трэба ўзбадзёрыцца. Своеасаблівым раздражняльнікам паслужыў гол высакаўчаніна Сяргея Коўбака. Зраўняць лік на табло змаглі яшчэ да перапынку з дапамогай Аляксандра Казанцава. Перамогу ж аформілі ў другім тайме. Спачатку папрацавала дальнабойная артылерыя даўбізнянскай дружыны: метраў з 25-і мяч у “рамку” загнаў Вадзім Кучынскі. Ён жа праз пэўны час ударам з лёту вызначыўся зноў. А паміж галамі Вадзіма лік на табло падкарэктаваў Дзмітрый Немцаў.

У цэнтральным матчы тура сустрэліся “Аграпрадукт” і “Белавежскі”. Лік у сустрэчы пасля трапнага ўдару Сяргея Асійчука адкрылі “алейнікі”. Белавежцы змаглі адквітацца ў сярэ­дзіне першага тайма. Вызначыўся Ві­талій Гарчук. А ўжо ў кампенсаваны арбітрам час Віталій прынёс сваёй камандзе перамогу (сваім поспехам галеадор “Белавежскага” абавязаны вельмі “ўдалай” гульні варатара “алейнікаў”).

У гульні паміж “Апошнім рубяжом” і “Камянецкай Пушчай” вынік вырашыў адзін мяч. На апо­шніх хвілінах першага тайма гол у раздзявалку атрымалі “пу­шчан­цы”. Пасля падачы з вуглавога перадачу галавой замкнуў Максім Жыгала.

ВЫНІКІ 10 ТУРА: ФК “Высокае” – ФК “Ніва” – 1:4, “Апошні рубеж” – “Камянецкая Пушча” – 1:0, ФК “Каменец” – “Каленкавічы” – 7:0, “Аграпрадукт” –  “Белавежскі” – 1:2, “Агра-Зарэчча” – “Стаўскі” – 5:0.