Узнагароды ўручылі школьнікам

Напярэдадні навагодніх святаў у 10 “А” класе СШ №2 г.Каменец віншавалі пераможцаў.

Па запрашэнні дэпутата Палаты прадстаўнікоў Нацыянальнага сходу Рэспублікі Беларусь па Белавежскай выбарчай акругі №8 Уладзіміра Пузырэўскага ў першай палове снежня група школьнікаў раёна наведала Мінск, прысутнічала на адным з пасяджэнняў Палаты прадстаўнікоў, а сам дэпутат адказаў на пытанні вучняў. Пра гэта паведамляла раёнка. Менавіта ў час той сустрэчы Уладзімір Іванавіч прапанаваў дзецям падзяліцца ўражаннямі аб убачаным у сталіцы, напісаць сачыненні на гэтую тэму. Прапанову школьнікі падтрымалі, і на працягу наступнага тыдня ў аддзеле адукацыі, спорту і турызму райвыканкама ўжо знаёміліся з іх творамі. Асабліва ўразіла сачыненне Лізаветы Кірылюк, вучаніцы 10 “А” класа СШ №2, якая не толькі апісала знаходжанне ў сталіцы рэспублікі, а і прадставіла свае вершы. У выніку такой своеасаблівай формы падачы работа была прызнана лепшай. Яе і накіравалі ў Мінск. А 24 снежня ў школе сустракалі госця – дэпутата Палаты прадстаўнікоў Уладзіміра Пузырэўскага, які ўручыў Лізе Кірылюк у падарунак электронную кнігу.

У той жа дзень у школе адбылася яшчэ адна прыемная падзея: старшыня райвыканкама Андрэй Пісарык уручыў вучню 10 “А” класа Уладзіславу Грэбню пасведчанне, падпісанае Прэзідэнтам Рэспублікі Беларусь Аляксандрам Лукашэнкам, аб узнагароджанні спецыяльным Фондам Прэзідэнта РБ па сацыяльнай падтрымцы адораных вучняў і студэнтаў як пераможцы заключнага этапа рэспубліканскай алімпіяды па фізіцы 2013 года. Варта дадаць, што юнака да адказных іспытаў рыхтаваў знакаміты Міхаіл Макаед.

Вера ІВАНЮКОВІЧ.

Фота Міколы ШУМА.