Ракаў не чапайце!

Брэсцкая міжраённая інспекцыя аховы жывёльнага і расліннага свету нагадвае рыбаловам-аматарам, што ў адпаведнасці з п.138 Правілаў вядзення рыбалоўнай гаспадаркі і рыбалоўства, зацверджаных Указам Прэзідэнта Рэспублікі Беларусь ад 8.12.2005 года №580, з 15 кастрычніка па 15 ліпеня ў рыбалоўных угоддзях устаноўлена забарона на лоўлю рака вузкапалага.

Забароны на розныя віды рыб (шчупак, налім, сом звычайны) устанаўліваюцца штогод з мэтай захавання рыбных рэсурсаў і стварэння спрыяльных умоў для іх узнаўлення ў перыяд нерасту.

Рыбаловам-аматарам неабходна ведаць, што за парушэнні патрабаванняў правілаў рыбалоўства прадугледжана адміністрацыйная адказнасць паводле ч.1 арт.15.35 Кодэкса аб адміністрацыйных парушэннях Рэспублікі Беларусь, у адпаведнасці з якой за здабычу рыбы (ракаў) – штраф ад 10 да 50 базавых велічынь (памер БВ – 100 тыс. руб.).

Акрамя гэтага, за ўрон, нанесены навакольнаму асяроддзю, г. зн. за кожную асобіну рака незалежна ад вагі і памеру, здабытую ў перыяд забароны, неабходна заплаціць іх таксавы кошт у трайным памеры. Напрыклад, за 1 асобіну рака вузкапалага – 1,5 базавай велічыні.

Усім грамадзянам, якія валодаюць інфармацыяй аб парушэннях прыродаахоўнага заканадаўства, паведамляем нумар тэлефона “гарачай лініі” Брэсцкай міжраённай і абласной інспекцый аховы жывёльнага і расліннага свету – 20-70-00.

Дзмітрый МУРЫН, намеснік начальніка БМІ.