Прыйшла вясна велікодная!

Кажуць, што радасць, падзеленая на дваіх, становіцца ўдвая большай. Праверыць на практыцы гэтую мудрую думку змаглі госці, якія завіталі вечарам 19 красавіка ў актавую залу Белавежскай СШ на свята, арганізаванае ўзорным фальклорным аб’яднаннем “Белавежская цявінка” па блаславенні настаяцеля Белавежскага храма святых пакутніц Веры, Надзеі, Любові і маці іх Софіі айца Ігара Аліферчыка.

“Дзякуй вам за тое, што згадзіліся раздзяліць з намі радасць Хрыстова Уваскрэсення!” Такімі былі першыя словы, з якімі звярнулася да гледачоў кіраўнік фальклорнага аб’яднання Ала Карпава. Яна і айцец Ігар шчыра павіншавалі ўсіх з цудоўным вясновым святам, а потым перадалі слова маленькім артыстам. Дзяўчынкі-кветачкі выразна чыталі вершы, спявалі велікодныя песні, а старэйшыя сябры ахвотна расказвалі ім пра Іісуса Хрыста і яго Уваскрэсенне. Той добра вядомы кожнаму аповяд з заміраннем сэрца слухалі ўсе.

А пасля надышоў час вясёлых танцаў: “Кракавяк”, “Полька-бабачка”, “Базар”… Ала Карпава разам з мужам і дачкой выканалі акапэла песню на мясцовай гаворцы, якую з асаблівым хваляваннем слухала ганаровая госця свята Софія Аляксандраўна Панасюк з Мінкавічаў (ад яе “Белавежская цявінка” пераняла большую частку свайго рэпертуару).

Не абышлося, безумоўна, і без жартоўных вершаў, без традыцыйных гульняў у біткі і скочвання фарбаваных яек з дошачкі. А на завяршэнне свята юныя артысты ўзгадалі пра тое, што чацвер на паслявелікодным тыдні называюць у народзе “бабскім вялікаднем” і падчас яго прынята аблівацца вадою. Здагадайцеся, што чакала гледачоў у наступнае імгненне…

Усе дзеткі атрымалі ад айца Ігара невялікія абразкі і салодкія падарункі ў знак удзячнасці за падоранае свята і за тое яшчэ, што прыйшла нарэшце велікодная вясна.

Настасся НАРЭЙКА.

Фота Міколы ШУМА.