Прадстаўнікі ўлады наведалі з віншаваннямі двух ветэранаў Вялікай Айчыннай

Другога ліпеня, напярэдадні Дня Незалежнасці Рэспублікі Беларусь, дэпутат Палаты прадстаўнікоў Нацыянальнага сходу Рэспублікі Беларусь, старшыні Камянецкіх райвыканкама Віталій Кулак і раённага Савета дэпутатаў Аксана Высагроцкая, начальнік упраўлення па працы, занятасці і сацыяльнай абароне райвыканкама Надзея Саўчук, старшыня Войскага сельвыканкама Віктар Міхайлоўскі, аматарскае аб’яднанне “Вечарынка” Відамлянскага СДК і вядучы Пётр Каралёў прыехалі ў Мікалаева.

Тут жыве Еўдакія Іванаўна Папова, узнагароджаная ордэнамі і медалямі СССР за самаадданую працу і бездакорную воінскую службу ў тыле ў гады Вялікай Айчыннай вайны. З вялікай радасцю і ўдзячнасцю ветэран прыняла з рук гасцей паштоўку-трохвугольнік ад Прэзідэнта нашай краіны, віншавальны адрас за подпісам старшыні Палаты прадстаўнікоў Нацыянальнага сходу Рэспублікі Беларусь Ігара Сергеенкі, кветкі і падарункі (сярод апошніх, дарэчы, былі прадукты, што выпускаюцца на Камянеччыне). І цудоўным дапаўненнем да шчырых віншавальных слоў сталі песні ў выкананні “Вечарынкі”, асабліва – “Кацюша”.

Наступным віншаванні ў перадсвяточны дзень прымаў Міхаіл Фёдаравіч Лось з Індыч (да яго завіталі ў тым жа саставе, толькі старшыню з Войскай змяніла сакратар Пелішчанскага сельвыканкама Алена Пыжык). Дзядуля таксама атрымаў шматлікія падарункі, пранікся цёплымі словамі на свой адрас і быў вельмі расчулены ўвагай, якой не абдзяляюць яго ні ў святочныя, ні ў будзённыя дні. (Міхаіл Фёдаравіч таксама ўзнагароджаны ордэнамі і медалямі СССР за самаадданую працу і бездакорную воінскую службу ў тыле ў гады Вялікай Айчыннай.)

І галоўным пажаданнем, што гучала ў гэты дзень з вуснаў бабулі і дзядулі, стаў мір. Каштоўны і неабходны, заваяваны вялікай цаною і варты таго, каб яго зберагаць.

Настасся НАРЭЙКА
Фота аўтара

Хотите читать актуальные новости Каменца и Каменецкого района первыми?Подписывайтесь на наш Телеграм-канал по ссылке https://t.me/navinykam