Па снежным накаце

Прыйшоў час завірух і галалёдзіцы. З пагаршэннем умоў надвор’я рэзка ўзрастае і аварыйнасць на нашых дарогах. Вось і першы месяц новага года не стаў выключэннем.

11 студзеня жыхар Каменца,1981 г. н., на Аўдзі-80 па вул. 40 год Кастрычніка райцэнтра выехаў на паласу сустрэчнага руху і сутыкнуўся з Фальксвагенам, які рухаўся ў сустрэчным накірунку. У выніку абодва аўтамабілі пашкоджаны.

18 студзеня вадзіцель прыватнага ўнітарнага прадпрыемства “Кааптранс”, едучы на аўтамабілі ГАЗ па вул.Чкалава ў Каменцы, не выбраў бяспечную дыстанцыю да аўтамабіля БМВ і пры зніжэнні хуткасці апошнім дапусціў з ім сутыкненне. У ДТЗ ніхто не пацярпеў, машыны атрымалі механічныя пашкоджанні.

У той жа дзень, 18 студзеня, жыхар Брэста рухаўся на Фальксваген-Гольфе па дарозе Цюхінічы – Высокае – граніца РП у накірунку абласнога цэнтра. Не выбраў бяспечную хуткасць, выехаў на правую па ходу руху абочыну і пры заносе аўтамабіля не справіўся з кіраваннем, “выскачыў” на паласу сустрэчнага руху і сутыкнуўся з Фальксваген-Пасатам (гл. здымак). Вадзіцелі абодвух аўто атрымалі раненні, машыны пашкоджаны.

19 студзеня брастаўчанін на Сітраене ехаў па вул.Брэсцкай у накірунку вул.8 Сакавіка ў Каменцы. На закругленні дарогі ўлева не выбраў бяспечную хуткасць з улікам заснежанага і слізкага пакрыцця і пры заносе аўтамабіля не справіўся з кіраваннем, сутыкнуўся з Фальксваген-Шаранам, які рухаўся ў сустрэчным накірунку. Вынік ДТЗ – пашкоджаныя аўтамабілі.

21 студзеня раніцай, у 7.30, жыхар Пелішча на ВАЗе наехаў на гужавую павозку, якая не была абсталявана ліхтарамі. На шчасце, ніхто не пацярпеў, пашкоджаны транспартныя сродкі.

Аляксандр ГЕРАСІМУК,

старшы дзяржаўтаінспектар аддзялення ДАІ.