На прыём да ўчастковага. Карэспандэнт НК даведалася, з чым прыходзяць грамадзяне

Згодна з рашэннем Міністэрства ўнутраных спраў Рэспублікі Беларусь, кожную сераду з 10.00 да 13.00 жыхары сельскіх населеных пунктаў могуць прыйсці за дапамогай і парадай да свайго ўчастковага інспектара міліцыі. Так было і 14 снежня на ўсіх без выключэння грамадскіх пунктах аховы правапарадку раёна.

Рэдакцыя завітала ў адзін з іх, размешчаны ў будынку Відамлянскага сельвыканкама, – тут вёў прыём грамадзян старшы ўчастковы інспектар міліцыі Сямён Шульган. За яго спінай, дарэчы, – 15-гадовы вопыт работы ў РАУС, выдатнае веданне свайго ўчастка (да яго належаць, акрамя аграгарадкоў Відамля і Турная Вялікая, яшчэ 18 вёсак) і людзей, што жывуць тут.

14 снежня на прыём да Сямёна Леанідавіча, прыйшлі двое жыхароў Відамлі.

Першае пытанне гучала так: “Як стаць паляўнічым?” Старшы ўчастковы накіраваў мужчыну, які цікавіўся гэтым, на сайт belgosohota.by, дзе дзякуючы сучасным тэхналогіям можна, не выходзячы з дома, прайсці патрэбнае навучанне. Што зрабіць для гэтага? Пасля аплаты атрымаць код для ўваходу на сайт, зарэгістравацца і вучыцца на працягу 28 каляндарных дзён. Калі гэты тэрмін міне, будучаму паляўнічаму прыйдзе дазвол на здачу экзамена. Яго, дарэчы, прымаюць толькі па панядзелках у Брэсце (вуліца Кобрынская, 57). Дзяржаўнае пасведчанне на права палявання ў вашых руках? Тады неабходна устанавіць дома сейф з дзвюма ячэйкамі для зброі і боепрыпасаў, прычым, зачыняцца ячэйкі павінны асобнымі ключамі. А сейф неаходна прымацаваць ці да сцяны, ці да падлогі. Бяспека – перш за ўсё!

Другая заяўніца пацікавілася ў Сямёна Леанідавіча, як і дзе ёй памяняць пашпарт. Старшы ўчастковы запісаў для жанчыны графік работы пашпартнага стала ў Каменцы. Ён, дарэчы, знаходзіцца цяпер у будынку райаддзела міліцыі і па серадах працуе да 20.00, значыць, была магчымасць вырашыць пытанне з пашпартам у той жа дзень.

А вы ведаеце свайго ўчастковага? І тое, што завітаць да яго на прыём можна кожную сераду? Бярыце на заметку!

Настасся НАРЭЙКА.

Фота аўтара.