Традыцыя святкавання Новага года 1 студзеня з’явілася падчас праўлення Пятра I. Ён выдаў указ, каб людзі прыбіралі ёлкі і сосны, віншавалі адзін аднаго са святам і дарылі падарункі. З тых часоў ёлка з’яўляецца сімвалам зімовага свята.
На тэрыторыі Камянеччыны налічваецца 5 плантацый навагодніх ёлак. Гэта спецыяльна адведзеныя ўчасткі зямлі, дзе ствараюцца пэўныя ўмовы для таго, каб ёлка вырасла сапраўднай прыгажуняй. Яна патрабуе догляду, і пакуль трапіць на свята, пройдзе не адзін год. «Спачатку трэба сабраць шышкі, з якіх атрымліваюць насенне. Праца – ручная, у некаторых выпадках выкарыстоўваюцца толькі спецыяльныя пад’ёмнікі, якія дазваляюць дабрацца да тых шышак, што вісяць высока. Іх перабіраюць і сартуюць, пашкоджаныя або няправільнай формы выбракоўваюцца. Сабраны матэрыял адпраўляецца ў Рэспубліканскі селекцыйна-насенняводчы цэнтр, дзе адбываецца іх абмалот. Здабытае насенне абяскрыльваюць, і яно чакае свайго часу. Базісны гадавальнік у Мяднянскім лясніцтве Брэсцкага раёна “адказвае” за забеспячэнне сеянцамі і насеннем. У час росту патрэбны догляд за дрэвам – скасіць траву, прарэдзіць рады, ачысціць плантацыю ад хмызняку. Перш чым ёлка адправіцца на рынак, пройдзе 7-10 гадоў”, – распавядае Ігар Мацюшык, ляснічы Камянецкага лясніцтва.
У мінулым годзе гэтым лясніцтвам было рэалізавана каля 2600 элітных ёлак. Каля 170 адправіліся ў Брэст для складання ёлкі на галоўнай плошчы (на металічны каркас мацуюцца маленькія ялінкі, з якіх і атрымліваецца вялікая прыгажуня).
З кожным годам усё больш складана адшукаць ёлку для плошчы ў горадзе. На ўскраінах лясоў ужо практычна іх не засталося, а для таго, каб яе вывезці з лесу, патрэбен верталёт. Даводзіцца шукаць ёлку на прыватных падворках. І ў гэтых выпадках хапае праблем, у прыватнасці, з транспарціроўкай.
Попыт на зялёных прыгажунь з кожным годам павялічваецца. Зноў вяртаецца мода на натуральныя ёлкі. Бо не параўнаецца штучная з той, якая ўвабрала пах ветру, водар лесу.
Цэны на святочныя дрэвы, як заўсёды, даступныя. Пачатак продажу ў Камянецкім лясніцтве і на рынку – у 20-х чыслах снежня. У гэтым годзе пад рэалізацыю адведзена 1000 навагодніх дрэў. Ёлка вышынёй да 1 м будзе каштаваць каля 25 тысяч рублёў, а на ёлачных базарах – 30. Дрэва вышынёй ад 1 метра да 2-х абыдзецца да 32 тысяч рублёў, лясная прыгажуня «ростам» ад 2 да 3 метраў па кошце не перавысіць 45 тысяч. Даражэй за ўсё будзе каштаваць ёлка вышынёй больш за 10 метраў – каля 350 тысяч. Лясгас прапануе пакупнікам не толькі ёлкі, але і сосны, паводле запыту. Продаж будзе наладжаны і да праваслаўных Каляд – для храмаў.
Мяне заўсёды цікавіла пытанне, што робяць з ёлкамі, якія ўжо ссеклі, але пакупнік на іх не знайшоўся. Аказваецца, гэты працэс кантралюецца, ёлкі падвозяць згодна з пакупніцкай актыўнасцю, і ніхто абыякава плантацыямі іх не высякае. Таму “лішнія” ёлкі практычна не застаюцца.
Вырашана пытанне з утылізацыяй паслясвяточных ёлак. Іх складваюць каля дамоў, а камунальнікі збіраюць, дробняць на трэскі і спальваюць.
Той, хто хоча радавацца ёлцы доўга, можа купіць дрэва з каранямі і пасля свята высадзіць, скажам, на дачным участку або ля дома, тады штогод можна ўпрыгожваць жывое дрэва ў двары. Нават ля самай шумнай магістралі можна жыць спакойна, калі абараніць свой дом ёлкамі. Яны лічацца найлепшымі вартаўнікамі цішыні. Таксама ёлка лепш, чым іншыя дрэвы, ачышчае паветра, пастаўляе кісларод. Прыкладна чатыры сярэдняй велічыні ёлкі на ўсё жыццё забяспечваюць дыханне аднаго чалавека.
Важна! У пераднавагодні перыяд дзяржаўная лясная ахова ўзмацняе абарону лясных масіваў ад незаконных высечак. Будуць арганізаваны рэгулярныя рэйдавыя мерапрыемствы. На дарогах сумесна з Дзяржаўтаінспекцыяй установяць кантрольныя пасты. Беражыце прыроду і не займайцеся незаконнай высечкай лясоў.
Дар’я ДЗЯМЯНКА.
Фота з архіва
Камянецкага лясніцтва.
Это может быть интересно:
-
Это важно! О декларировании доходов
-
1 сентября 2024 года распахнет свои двери Могилевский специализированный лицей МВД
-
Размер суточных для служебных командировок в пределах Беларуси повышается до 12 рублей
-
В Каменце 247 человек обратились за консультацией к врачам-онкологам за один день
-
В каком случае дом признают пустующим и забирают в собственность государства