Крымінал

Як вядома, крадзяжы часцей за ўсё адбываюцца тады, калі хтосьці страчвае пільнасць, давярае ненадзейным асобам. Аб чым сведчаць і гэтыя крымінальныя справы, узбуджаныя адпаведна 28 і 29 кастрычніка.

Знік разам з пілой

Жыхарка вёскі Грушаўка папрасіла распілаваць дровы мужчыну, які неаднаразова быў судзімы, не мае пастаяннага месца жыхарства. Ведала гаспадыня гэта ці не, але даверыла для работы дарагі інструмент: бензапілу замежнай вытворчасці. Пад вечар, як нале­жыць, пачаставала работнічка. Той выпіў, закусіў і… знік разам з бензапілой. Асоба падазронага ў крадзяжы ўстаноўлена, ён затрыманы ў Брэсце.

“Клюнуў” на долары

Гэты 16-гадовы юнак, жыхар Агароднікаў, сёлета вясной ужо прыцягваўся да адказнасці за крадзёж грошай. А нядаўна ў адной з кватэр г.Высокае прыхапіў 125 долараў ЗША. Здарылася гэта пры такіх абставінах: яго і іншых знаёмых запрасіў да сябе юны высакаўчанін, маці якога не было дома. Хлопцы весела ба­вілі час. Аматар “баксаў” застаўся пераначаваць, а пад ранак пакінуў кватэру гасціннага сябра, прыхапіўшы валюту. Вядома, больш дакладна ўсе дэталі высветляцца ў ходзе следства. Адно вядома: сапсаваў юнак сабе біяграфію.

Падрыхтавалі Васілій МІХАЕВІЧ

і Андрэй БІЛЕВІЧ, старшыя следчыя

райаддзела Следчага камітэта.