Камянецкі хлебазавод прадставіў новую прадукцыю

Нядаўна асартымент Камянецкага хлебазавода папоўніўся навінкамі: тут пачалі выпякаць заварны хлеб “Ржаная нива”, “Рижский с медом”, “Духмяный”, “Элитный”, “Бородинский” у фармавым выглядзе і подавым.

Кожныя суткі асартымент прадукцыі на прадпрыемстве складаецца з 60-і найменняў, а хлебабулачных вырабаў выпякаюць да 3-х тон. Мука сю­ды паступае не толькі з Брэсцкага камбіната хлебапрадуктаў, і ўся яна з айчыннага зерня.

– Яно стабільнае па колькасці і якасці клейкавіны, – кажа начальнік лабараторыі хлебазавода Вераніка Мярзлова, – але ўсё роўна праца з хлебам, які для нас нібы жывая істота, патрабуе надзвычай вя­лікай увагі і дакладнасці. Бо наступная партыя мукі можа мець нейкія адрозненні ад папярэдняй, што трэба абавязкова мець на ўвазе.

Хлеб выпякаем па канкрэтных заяўках, і тое, што іх колькасць, у тым ліку на новыя для нас сарты заварнога хлеба, не зніжаецца, сведчыць, што яны прыняты спажыў­цом, што мы яму дагадзілі. Прынамсі, класічныя рэцэпты “Бородинского” нашы пекары “ператварылі” ў той са­мы славуты хлеб з цёмнай глянцавай корачкай, прыемным мякішам і саладкаватым смакам.

У залежнасці ад прапорцыі пэўнай мукі на прадпрыемстве выпякаюць хлеб жытне-пшанічны і пша­ніч­ны, а з улі­кам народных традыцый – з выкарыстаннем со­ладу, па­та­кі, каляндры, во­т­руб’я, суха­фруктаў, цукровага мёду. Упор тут робяць на распрацоўку палепшаных за­варных сартоў хлеба.

Доля хлебабулачных выра­баў у агульным аб’ёме вытворчасці складае 90%, кандытарскіх – 10%. Выпускаюць тут яшчэ і харчовыя канцэнтраты для рэалізацыі ў розніцы.

Камянецкі хлеб – на паліцах магазінаў “белкаапсаюзаўскай” гандлёвай сеткі, у т. л. у Жабінцы, Брэсце, ва ўстановах закрытага тыпу (паводле вынікаў абавязковых тэндэраў). А яшчэ яго ахвотна бярэ “Еўраопт”, дзе ўвогуле цэняць разнастайнасць. Канкурэнцыя на тым рынку высокая, і рэалізацыю 3-х тон печанага хлеба ў суткі камя­нецкія пекары лічаць неблагім вынікам сваёй працы, дакладней – ацэнкай спажыўцоў. Прычым названая лічба – вышэй, чым была месяцы тры назад.

Галіна НОВІК.

 Фота Віталія Дулевіча.