Дзень абаронцаў Айчыны ў Дзмітровічах

Абаронцы Айчыны не старэюць. Упэўніцца ў гэтым маглі ўсе, хто завітаў 22 лютага ў Дом сумеснага самастойнага пражывання для пажылых грамадзян у Дзмітровічах.

Да дзядуль, якія жывуць тут, з нагоды свята – Дня абаронцаў Айчыны – прыйшлі з канцэртнай праграмай шматлікія госці як з аграгарадка, так і з райцэнтра.

Пасля ўступнага слова загадчыка філіяла Камянецкага ТЦСАН дом сумеснага самастойнага пражывання для грамадзян пажылога ўзросту Таццяны Натчук да мікрафона ва ўтульнай зале выйшла вядучая – загадчыца аўтаклуба ДУК “Камянецкая раённая клубная сістэма” Таццяна Гурынчук. І першымі мужчын віншавалі самыя юныя ўдзельнікі канцэрта, вучні мясцовай сярэдняй школы, што займаюцца вакалам у Дзмітровіцкім СДК – хор выканаў задорную песню, пасля чаго дзеці ўручылі дзядулям, што прысутнічалі ў зале, зробленыя сваімі рукамі тэматычныя сувеніры.

Потым юныя салісткі Варвара Кос (у форме ваенных гадоў) і Ганна Ятчук прадставілі асобныя музычныя нумары, а Лізавета Натчук прачытала верш, слухаць які без слёз было практычна немагчыма.

Наступнымі на імправізаваную сцэну выйшлі госці з Каменца. Клуб аматараў песні “Калінушка” пад кіраўніцтвам Ірыны Козел парадаваў добрымі, душэўнымі песнямі (іх “Катюшу” спявалі ўсе разам!) і развесяліў слухачоў гумарыстычнай сцэнкай. За музычнае афармленне нумароў артыстаў адказваў гукааператар Дзмітровіцкага СДК Сяргей Мартынюк.

Свята завяршылася на мажорнай ноце, пакінуўшы ў душах яго ўдзельнікаў толькі радасць. Са святам вас, нашы абаронцы!

Настасся НАРЭЙКА.

Фота аўтара.