Члены гурткоў “Юныя турысты”, “Юныя краязнаўцы” і “Юныя этнографы” Камянецкага цэнтра турызму і краязнаўства, вучні Камянюцкай, дзвюх камянецкіх сярэдніх школ пабывалі на экскурсіі ў Брэсце, наведалі дэльфінарый і выставу трапічных матылькоў у зімовым садзе.
Колькі ўражанняў атрымалі дзеці ад сустрэчы і зносін з дэльфінамі і марскімі коцікамі! Даведаліся шмат цікавых фактаў пра жыццё і звычкі гэтых жывёлін, убачылі іх здольнасці (маляванне, спевы, танцы, акрабатыка, гульні з мячом і інш.), пазнаёміліся з работай дрэсіроўшчыка Антона Дунаева.
Не менш пазнавальнай была і выстава экзатычных матылькоў, прывезеных з Амерыкі, Аўстраліі і іншых кантынентаў. Экскурсавод расказваў пра разнастайнасць гэтых насякомых, іх памеры, лад і працягласць жыцця, размнажэнне, харчаванне, умовы ўтрымання. Вучні любаваліся прыгажосцю матылькоў, на памяць аб іх засталіся фотаздымкі і сувеніры.
Каб такая цікавая паездка ўдалася, дапамаглі дырэктар Навіцкавіцкай СШ І.С. Мешчанчук і вадзіцель Л.С.Ліповік. Вельмі ўдзячны ім за прадастаўлены транспарт. 
Спадзяемся на ўзаемавыгаднае супрацоўніцтва і новыя сустрэчы на экскурсійных маршрутах Брэстчыны.
Наталля СІДАРУК,
метадыст раённага цэнтра турызму і краязнаўства.