Да вяршыняў міжнароднага алімпа

Перада мною прыгожы, з вялікімі карымі вачыма, юнак, з прыемнай усмешкай, гаварлівы, які нічым не адрозніваецца ад сваіх равеснікаў. І ўсё ж… Максім Ліцкевіч, вучань 11-га класа сярэдняй школы №2 г.Каменец, – пераможца чацвёртага (заключнага) этапа рэспубліканскай алімпіяды па фізіцы, якая праходзіла ў Віцебску. Дарэчы, трэці год запар Максім – лепшы сярод лепшых у Беларусі знаўца фізікі.

– Максім, такі вынік на рэспубліканскай алімпіядзе – гэта не выпадковасць?

– Вядома, не. Фізікай пачаў займацца з сёмага класа. Ужо ў восьмым прыняў удзел у адкрытай алімпіядзе Мінска і заняў першае месца. З’явіўся інтарэс. А тут яшчэ побач – любімы настаўнік Міхаіл Міхайлавіч Макаед, які дасканала ведае прадмет, умее працаваць творча.

– Колькі прыблізна часу праводзіш у кабінеце фізікі?

– Вельмі многа, гадзіны напралёт, без выхадных. Гэта ўжо сістэма падрыхтоўкі алімпіяднікаў, распрацаваная Міхаілам Міхайлавічам.

– Асаблівасць сёлетняй алімпіяды…

– Заданні вельмі складаныя. Ды і мэта была іншая, таму што 11 клас, – атрымаць дыплом, каб стаць студэнтам без уступных іспытаў. Тым больш, сапернікаў ужо ведаў, што называецца, у твар. Амаль усе яны – навучэнцы ліцэяў.

– Адносіны з сапернікамі?

– Самыя дружалюбныя, нават сяброўскія. З многімі адпачываў як пераможца алімпіяды ў лагеры “Зубраня”.

– Якія пачуцці паспытаў, калі даведаўся аб перамозе?

– Была нейкая стома, не верылася …

– Твае найбліжэйшыя планы?

– Яны самі акрэсліліся пасля перамогі. Жадаю большага, пакарыць вяршыню міжнароднага алімпа, трапіць на алімпіяду ў Данію, у Капенгаген.

– Ну і як?

– Усё добра. На зборах, якія адбыліся пры ліцэі БДУ у  Мінску з 22 па 29 красавіка, прайшоў адбор у каманду на міжнародную алімпіяду. Выбралі пяцёра лепшых з лепшых, я таксама трапіў.

– Што ж, Максім, зноў гадзіны неадступнай працы?

– Так. У кожнай справе патрэбны веды, настойлівасць. А яшчэ будуць два этапы збораў у Мінску.

– Якая асаблівасць гэтых збораў?

– Ідзе вельмі сур’ёзная падрыхтоўка каманды. Фізікай займаемся шэсць гадзін у дзень.

– Калі адбудзецца міжнародная алімпіяда?

– З 7 па 15 ліпеня.

– А твае далейшыя планы?

– Вызначыцца з вышэйшай навучальнай установай.

– Поспехаў табе, Максім, удачы, здзяйснення задуманага. Няхай пакарыцца табе міжнародны алімп. А мы будзем за цябе хварэць!

Гутарыла Алена ПРАКАПЧУК,

намеснік дырэктара

па вучэбнай рабоце СШ №2 г.Каменец.