“Дай лапу, Эра!”. Знаёмiмся з сабакам, што нясе службу

Пасябраваць з сабакам па мянушцы Эра, што нясе службу ў Дэпартаменце аховы МУС, у першы дзень снежня змаглі выхаванцы раённага цэнтра карэкцыйна-развіваючага навучання і рэабілітацыі і вучні пачатковых класаў СШ №1 Каменца.

Да дзяцей разам з нямецкай аўчаркай завіталі міліцыянер-кінолаг, старшына міліцыі Вадзім Турубчук і міліцыянер-вадзіцель, старшына міліцыі Арцём Фісюк (мерапрыемства прымяркоўвалася да Дня інвалідаў Рэспублікі Беларусь). З вялікім захапленнем дзеці і іх педагогі назіралі за тым, як Эра выконвала каманды свайго гаспадара (прычым, нават тыя, што падаваліся не голасам, а жэстам!), а адну з іх – “Апорт!” – змаглі даць Эры ўсе дзяўчынкі і хлопчыкі, што выказалі такое жаданне. Уразіла гледачоў і паказальнае затрыманне злачынцы.

Фота на памяць з Эрай і супрацоўнікамі Дэпартамента стала заключным акордам захапляльнай сустрэчы.

Фота Настассі НАРЭЙКІ.