Ганна Сірацюк сярод “Лепшых людзей”

На гэтым тыдні старшыня райкама прафсаюза работнікаў аграпрамысловага комплексу Ірына Дуднікава і прафсаюзны лідар ААТ “Белавежскі” Валянцін Супрыновіч завіталі з падарункамі ў госці да Ганны Сірацюк. Яна і яе напарнік Ігар Куляшоў сёлета заваявалі Кубак свету па спартыўных танцах на калясках. Праходзіў ён у Галандыі.

А падарунак быў не зусім звычайны: дзяўчына атрымала Вялікую міжнародную энцыклапедыю “Лепшыя людзі”, у якую ўвайшлі знакамітыя асобы з Беларусі, Расіі, Украіны і Казахстана. Сярод іх – і імя нашай зямлячкі з Белавежскага, у скарбонцы якой больш за 50 перамог на розных спаборніцтвах свету па спартыўных танцах на калясках (яна – інвалід 1-й групы).

Ганна – трэнер рэспубліканскага танцавальна-аздараўленчага цэнтра спартсменаў-інвалідаў у в.Калодзішча Мінскага раёна. У 2009 годзе была ўдастоена ганаровага звання “Чалавек года” ў намінацыі “Фізічная культура, спорт і турызм”…

У верасні сёлета Ганна і Ігар бралі ўдзел у Кубку кантынентаў, занялі 2-е месца. У маі маладыя людзі прымалі ўдзел ў фестывалі Эльдара Аліева ў Азербайджане.

Наперадзе – яшчэ шмат перамог і планаў. Але для Ганны Сірацюк і Ігара Куляшова зараз вельмі напружаны перыяд: іх чакае Токіа, дзе 7 і 8 снежня пройдзе чэмпіянат свету па спартыўных танцах на калясках. Поспехаў вам!

Фота Наталлі ГРЫЦУК.