Выратуем лес ад пажару

Вялікая ўвага ўдзяляецца ў Беларусі прафілактыцы пажараў – самага страшнага ворага лесу. Для арганізацыі прадухілення, выяўлення і ліквідацыі лясных пажараў у сістэме Мінлясгаса функцыянуе Дзяржаўная лясная ахова.

З пачатку пажаранебяспечнага сезона 2012 года ў Беларусі зафіксавана 211 выпадкаў лясных пажараў, у выніку якіх пацярпела больш за 61 га лесу. Найбольшы ўрон у гэтым годзе пажары нанеслі лясам Брэсцкай вобласці.

Галоўнай прычынай узгаранняў у лесе па-ранейшаму з’яўляецца чалавечы фактар. Больш за 50 працэнтаў пажараў узнікае па віне людзей, якія грэбуюць правіламі пажарнай бяспекі ў лясах. У Мінлясгасе нагадваюць, што згодна з артыкулам 15.29 Кодэкса Беларусі аб адміністрацыйных правапарушэннях, парушэнне патрабаванняў пажарнай бяспекі ў лясах або на тарфяніках або забароны на іх наведванне, якое прывяло да знішчэння або пашкоджання лесу або тарфянікаў, вядзе да накладання штрафу ў памеры ад 25 да 50 базавых велічынь (цяпер базавая велічыня роўная Br100 тыс.). Парушэнне патрабаванняў пажарнай бяспекі ў лясах або на тарфяніках або забароны на іх наведванне, якое не прывяло да прычынення ўрону, прыводзіць да папярэджання або накладання штрафу ў памеры да 25 базавых велічынь. Згодна з артыкулам 15.58 Кодэкса Беларусі аб адміністрацыйных правапарушэннях, распальванне вогнішча ў забароненых месцах вядзе да папярэджання або накладання штрафу ў памеры да 12 базавых велічынь. Забараняецца ўезд на ўсе лясныя дарогі (за выключэннем дарог агульнага прызначэння, якія праходзяць праз лясныя масівы), самастойна адкрываць апушчаныя шлагбаумы на ўездах у лес.

Міністэрства лясной гаспадаркі Беларусі заклікае грамадзян выконваць правілы пажарнай бяспекі ў лясах.