
Сёлета вучобу ў Высокаўскім дзяржаўным сельскагаспадарчым прафесійна-тэхнічным каледжы завяршаюць больш за сто юнакоў і дзяўчат, якія атрымліваюць прафтэхадукацыю і сярэдне-спецыяльную. Рабочае месца гарантавана. Многія прадоўжаць вучобу ў ВНУ, у асноўным без адрыву ад вытворчасці.
А тым часам – зноў клопат пра абітурыентаў, пра тых, хто ў верасні пачне вучыцца выбранай прафесіі. Дэмаграфічнае пытанне ніхто не знімаў з раскладу дня. Статыстыка сведчыць, што за пяць гадоў колькасць выпускнікоў школ зменшылася ці не на трэць. Таму адначасова даводзіцца думаць і пра план набору, і пра планку якасці. Найбольш блізка з магчымасцямі і ўмовамі вучобы ў каледжы старшакласнікі знаёмяцца ў Дні адчыненых дзвярэй. Разам з падлеткамі ў Высокае едуць і іх бацькі, каб дакладна ведаць, у якіх умовах будзе вучыцца сын ці дачка. Так, дзяўчат у каледжы сёння нямала – атрымліваюць прафесіі повара, кантралёра-касіра, аператара ЭВМ…
Аднак, асноўная мэта навучальнай установы – падрыхтоўка кадраў для сельгасвытворчасці, ды каб у нагу з часам. Трактарыст-машыніст катэгорыі А,В,Д, вадзіцель катэгорыі С, электразваршчык… Таму ж механізатару сёння неабходна ведаць камп’ютар, бо сучасная тэхніка нашпігавана электронікай, і не толькі дзеля камфорту. Таму колішняе “вучышся на двойкі – будзеш трактарыстам” цяпер не адпавядае тэме дня. Педагогі каледжа прыводзяць нямала прыкладаў, калі ўчарашні “слабы” школьнік раскрывае свае здольнасці іменна на занятках у каледжы, бо любіць тэхніку, мае жаданне “даследаваць” яе, зразумець работу механізмаў – заадно з’яўляецца інтарэс і да фізікі, матэматыкі. Будучыя тэхнікі-механікі пачынаюць вучобу таксама з першай ступені навучання.
Тры ў адным
Як зазначае дырэктар каледжа Аляксандр Шурхай, адметнасць у тым, што тут можна атрымаць агульную сярэднюю, прафесійна-тэхнічную і сярэдне-спецыяльную адукацыю.
– Выпускнік, які атрымае дыплом аб завяршэнні прафесійна-тэхнічнай адукацыі, у адрозненне ад выпускніка школы з атэстатам аб сярэдняй адукацыі, мае яшчэ і прафесію. Для юнакоў даецца адтэрміноўка ад прызыву ва Узброеныя Сілы РБ на час вучобы, а для выпускнікоў, якія паступаюць у ВНУ і сярэдне-спецыяльныя ўстановы, – і на ўступную кампанію. Вучоба ў каледжы залічваецца ў працоўны стаж. У час вытворчага навучання не менш як 75% грашовых сродкаў за вырабленую прадукцыю (работы, паслугі) накіроўваецца на матэрыяльнае заахвочванне навучэнцаў з улікам іх удзелу. На канікулах таксама можна зарабіць уласныя грошы, бо арганізуецца часовая працоўная занятасць моладзі. Для падрыхтоўкі спецыялістаў, здольных працаваць на сучасных камбайнах і трактарах, тут створаны адпаведныя ўмовы. Усяго ў каледжы больш за 150 адзінак сельгастэхнікі і энергетычных сродкаў для практычнага навучання. Праўда, тэхнічная база тут па вядомай прычыне не можа штогод папаўняцца найноўшай тэхнікай, якая сёння на палях гаспадарак. Юнакі вучацца працаваць на ёй падчас вытворчай практыкі пад апекай майстроў і вопытных механізатараў у тых жа гаспадарках, часта там, адкуль родам.
Не варта думаць, што рыхтуюць адно толькі “технарей”,– у каледжы нямала выкладчыкаў, якія працуюць і вучаць працаваць творча як на занятках тэхнічнага профілю, так і гуманітарнага. Вось і на гэтым тыдні тут адбыўся конкурс чытальнікаў, пераможца – першакурснік Яўген Ільютчык з Белавежскага. Усё дзеля таго, каб маладыя людзі былі неабыякавымі і дапытлівымі. Ёсць у каледжы і вынаходнікі з ліку навучэнцаў.
Выпускнікі атрымліваюць некалькі кваліфікацый, што дазваляе ім быць канкурэнтаздольнымі на рынку працы.
У кантакце не толькі з бацькамі
Калі бываеш у каледжы, немагчыма не адзначыць, з якой гатоўнасцю ідуць насустрач выкладчыкі, як індывідуальна гавораць пра сваіх вучняў, глыбока і з веданнем спраў – аб іх вучобе. Як з карысцю заняць вольны час навучэнцаў, як адцягнуць іх увагу ад шматлікіх спакус нашага часу, якія ўсё больш даступныя, – яшчэ адзін аспект увагі дырэкцыі каледжа. Працуюць у цесным кантакце з бацькамі. Бо гэта якраз той узрост падапечных, калі яны патрабуюць максімум свабоды, але не зусім усведамляюць, што такое адказнасць. Каледж цесна супрацоўнічае з грамадскімі раённымі і гарадскімі арганізацыямі, райаддзелам унутраных спраў, праваслаўнай царквою, установамі аховы здароўя, камісіяй па справах непаўналетніх з мэтай прафілактыкі шкодных звычак: наркаманіі, таксікаманіі, курэння.
За час нашай гутаркі матулі дваіх навучэнцаў наведаліся да дырэктара, кожную з іх паасобку прывяла нейкая набалелая праблема і, напэўна, з дапамогай педагогаў яна вырашыцца, бо – разам, бо неабыякавыя. А прафесія – аснова поспеху. І нават калі размова аб яе “даходнасці”, дык высокакваліфікаваны спецыяліст у любой галіне зможа знайсці добра аплачваемую работу, як і сваё месца ў жыцці.
Напрыканцы мая ў Брэсце на вуліцы Савецкай прадстаўнікі каледжа наладзяць прэзентацыю прафесій, якія маладыя людзі могуць атрымаць у Высокім…
Галіна НОВІК.
Это может быть интересно:
-
СЕГОДНЯ ИСПОЛНИЛОСЬ 70 ЛЕТ ДИРЕКТОРУ ОАО «ВИДОМЛЯНСКОЕ» МИХАИЛУ СТРАПКО
-
Прямые телефонные линии.Февраль
-
График плановых отключений электроэнергии в Каменецком районе
-
Когда-то здесь кипела жизнь: история деревни Мельники
-
Старшеклассники СШ №1 Каменца сегодня могли попробовать себя в роли пилотов пассажирского самолета